Erdogan telefonatë me Zelenskyn: Takimi me Putin duhet të ndodhë pa vonesa

Presidenti i Turqisë, Recep Tayyip Erdogan, i ka bërë thirrje homologut të tij ukrainas, Volodymyr Zelenskyy, që të mbështesë zhvillimin e bisedimeve në nivel udhëheqësish midis Ukrainës dhe Rusisë, duke theksuar se një hap i tillë do të ishte në dobi të përshpejtimit të procesit të paqes. Deklarata u bë gjatë një bisede telefonike mes dy liderëve të premten

Erdogan nënvizoi se ky takim duhet të ndodhë “pa vonesa të mëtejshme”, ndërsa ritheksoi rolin e Turqisë si ndërmjetësues konstruktiv në konfliktin ruso-ukrainas.

Gjatë bisedës, të dy presidentët diskutuan gjithashtu zhvillimet rajonale, çështjet globale dhe marrëdhëniet dypalëshe midis Ankarasë dhe Kievit, sipas një njoftimi zyrtar të Drejtorisë së Komunikimit të Presidencës turke.

Erdogan theksoi se diskutimi i një armëpushimi në raundin e dytë të negociatave që pritet të zhvillohen në Stamboll do të ishte një hap i rëndësishëm drejt paqes. Ai shtoi se pjesëmarrja e delegacioneve të nivelit të lartë është thelbësore për ruajtjen e vrullit të arritur deri tani në dialogun mes dy palëve.

Presidenti turk shprehu gjithashtu kënaqësinë për realizimin e shkëmbimit të të burgosurve, një marrëveshje e arritur gjatë takimit të mëparshëm në Stamboll dhe theksoi se Turqia do të vazhdojë përpjekjet për një paqe të drejtë dhe të qëndrueshme ndërmjet Ukrainës dhe Rusisë.

Raundi i parë i bisedimeve u mbajt më 16 maj në Stamboll dhe përfundoi me një marrëveshje për shkëmbimin e 1.000 të burgosurve nga secila palë, si dhe me angazhimin për të përgatitur memorandume për negociatat e ardhshme.

Si Moska ashtu edhe Kievi e kanë vlerësuar pozitivisht atë takim, duke rritur shpresat që raundi i qershorit të shënojë përparim konkret drejt një armëpushimi të mundshëm.

LEXONI GJITHASHTU:

• “Jemi në pikë kritike”- Turqia propozon një takim Erdogan, Putin, Trump dhe Zelensky
• “Putin është çmendur”- Kritikat e forta të Trump, nuk “kursehet” as Zelensky
• “Putin është çmendur, s’e di ç’i ndodhi”- Kremlini i përgjigjet deklaratave të Trump