U ndanë 3 miliardë lekë për dëmet nga tërmeti, 6300 kërkesa te shoqëritë e sigurimit

Kompanitë e sigurimeve kanë kompensuar rreth 90 për qind të rasteve të trajtuara për dëmet e tërmeteve të vitit 2019. Sipas Autoritetit të Mbikëqyrjes Financiare, kanë qenë rreth 6300 kërkesa dëmshpërblimi, për të cilat janë ndarë 3 miliardë lekë.

Për dëmet e shkaktuara nga tërmetet e vitit 2019, kompanitë e sigurimeve kanë paguar rreth 3 miliardë lekë, duke mbyllur 90% të praktikave përmes pagesave të dëmshpërblimit. Shifrat i bëri të ditura në Komisionin e Ekonomisë, drejtori i Autoritetit të Mbikëqyrjes Financiare, Ervin Mete, i cili referoi edhe numrin e kërkesave.

“Nga shoqëritë e sigurimit janë paguar gjatë vitit të kaluar rreth 3 miliardë dëme të tërmetit. Vlen të theksohet se vetëm 6 çështje rezultojnë të ankimuara në fund të vitit 2020 në Gjykata. Për ne është shifër e papërfillshme, duke pasur parasysh se në total janë 6295 kërkesa dëmshpërblimi për tërmetin”, tha Ervin Mete.

Duke folur për tregun e sigurimeve, Mete tha se ai shfaqi rezistencë gjatë vitit të pandemisë, ndërsa ky fillim vit shënoi rritje të ardhurave.

“4:08 Totali i aseteve në këto tregje u rrit me 1.5%, duke arritur në rreth 110 mld lekë, ose 6.8 % e PBB-së, kundrejt 6.5 % që ishte në vitin 2019”, u shpreh z. Mete.

Për të ruajtur qëndrueshmëri në treg, vitin e kaluar AMF mori vendim për pezullimin e shpërndarjes së dividendit për shoqëritë e sigurimit, si dhe një plan veprimi për rimëkëmbjen e 2 kompanive.