Ministri i Jashtëm i Iranit pranon se ka pasur dëme të mëdha në centralet bërthamore

Ministri i Jashtëm i Iranit, Abbas Araghchi, ka konfirmuar se sulmet ajrore të SHBA-së dhe Izraelit kanë shkaktuar dëme “tepër serioze” në centralet bërthamore të vendit. Ai njoftoi se Organizata e Energjisë Atomike e Iranit po kryen një vlerësim të detajuar të dëmeve.

Deklarata erdhi disa orë pasi Udhëheqësi Suprem i Iranit, Ajatollah Ali Khamenei, mohoi që sulmet të kishin shkatërruar programin bërthamor. Ai tha se goditjet amerikane nuk “arritën asgjë domethënëse”. Khamenei e cilësoi si “ekzagjerim” deklaratën e presidentit amerikan Donald Trump, i cili pretendoi se bombat kishin shkatërruar plotësisht tre centralet bërthamore iraniane.

Ndërkohë, ministri i Jashtëm theksoi se Irani nuk ka plane për të rifilluar bisedimet bërthamore me SHBA-në. Ai deklaroi se nuk është arritur asnjë marrëveshje apo rregullim dhe se qeveria po shqyrton mënyrën më të mirë për të përfaqësuar interesat e popullit iranian në diplomaci, duke paralajmëruar një “formë të re” qasjeje.

Sipas mediave ndërkombëtare, administrata Trump ka diskutuar mundësinë e lehtësimit të sanksioneve dhe lirimin e fondeve iraniane në këmbim të ndihmës për zhvillimin e një programi bërthamor civil, por zhvillimet e fundit mund të pengojnë këtë proces.

Parlamenti iranian miratoi së fundmi një ligj që ndalon bashkëpunimin me Agjencinë Ndërkombëtare të Energjisë Atomike, duke hequr kështu angazhimin e Iranit për inspektime ndërkombëtare.

Izraeli justifikon ofensivën e tij me pretendimet për ndalimin e planeve iraniane për zhvillimin e armëve bërthamore, ndërsa Irani insiston se programi i tij ka karakter vetëm civil.

LEXONI GJITHASHTU:

• A u hoq uraniumi nga centralet para goditjes? Flet Sekretari Amerikan i Mbrojtjes
• Trump mohon zhvendosjen e uraniumit nga Fordow: Asgjë nuk u nxor nga objekti