Kapen me mbi 1.2 kg kokainë në makinë, arrestohen dy të rinj në Tiranë

Dy të rinj janë arrestuar në flagrancë nga Policia e Tiranës, pasi u kapën me një sasi prej 1 kilogram e 234 gramë kokainë, e destinuar për shpërndarje në zona të ndryshme të kryeqytetit.

Shtetasit B. A. dhe R. S., të dy 27 vjeç dhe banues në Tiranë, u ndaluan teksa lëviznin me automjet në aksin “Ura e Beshirit-Pezë”, gjatë operacionit antidrogë të koduar “Furnitorët”, për të cilin policia kishte 3 muaj që po punonte.

Gjatë kontrolleve të ushtruara në automjet dhe banesat e të rinjëve, shërbimet e Policisë gjetën dhe sekuestruan lëndën narkotike kokainë, e cila dyshohet se do t’u shpërndahej bashkëpunëtorëve të tjerë për shitje me doza në zonat e “Tiranës së Re”, “Kombinatit” dhe Selitës.

Në cilësinë e provës materiale u sekuestruan gjithashtu automjeti dhe dy celularë që dyshohet se përdoreshin për komunikim dhe organizimin e aktivitetit kriminal.

Policia bën me dije se hetimet janë në vijim për të identifikuar dhe vënë përpara drejtësisë të gjithë personat e tjerë të përfshirë në këtë rrjet furnizimi dhe shpërndarjeje droge.

Materialet procedurale i janë referuar Prokurorisë së Tiranës për veprime të mëtejshme.

LEXONI GJITHASHTU:

• “Armët i bleja te një hoxhë”- Alibej tregon takimin me Dumanin: Videon e kam fshirë
• Erion Alibej: Shefat e policisë më thanë hajde jep dëshminë, e të lirojmë prapë