Merkato në Premier League: Arsenal synon Gyokeres e Rodrygo, Diaz mbetet i Liverpool

Arsenali synon të përforcojë edhe më tepër skuadrën deri në nisje të sezonit të ri futbollistik për t’i bërë ballë Manchester Cityt apo Liverpoolit, skuadra të cilat kanë fituar titullin kampion në vitet e fundit. Të dyja kanë bërë një merkato fantastike dhe kanë shpenzuar para e tani është radha e topçinjve. Këta të fundit po këmbëngulin për të afruar dyshen Gyokeres-Rodrygo, por deri më tani nuk ka asnjë akord.

Gyokeres i ka bërë të ditur Sportingut të Lisbonës se dëshiron të largohet nga kampionati portugez për në një ligë më të fortë, ndërsa interes ka pasur nga Juventus, Napoli, Man United dhe Arsenal. Lisbona kërkon të paktën 70 milionë euro për ta lënë të lirë 27-vjeçarin, i cili ka vendosur të mos paraqitet në fazën përgatitore. Arsenali beson se mund ta bindë lojtarin të transferohet në ishull së shpejti.

Sa i përket Rodrygo, situata nuk është në favorin e tij, e çuditërisht nga titullar me Ancelottin, me Alonson nuk aktivizohet. Nuk raportohet për përplasje mes palëve, por duket se lojtari nuk është në planet e teknikut spanjoll dhe i duhet të kërkojë një skuadër të re. Interes për të ka shfaqur dhe Bayerni e Man City.

Liverpool i ka mbyllur derën Bayernit të Mynihut dhe Barcelonës, duke u komunikuar se Luis Diaz nuk është në shitje. Futbollisti vlerësohet maksimalisht nga drejtuesit e për asnjë arsye nuk largohet nga Anfield.

LEXONI GJITHASHTU:

• Goditje në merkato nga Man City, Bayerni përforcon mbrojtjen
• Ndryshojnë rregullat e merkatos në Premiere League