Goditje në merkato nga Man City, Bayerni përforcon mbrojtjen

Transferimin e tij e kërkonte me ngulm prej 1 viti dhe tani është realitet, Trent Alexander Arnold është blerja më e re e Realit të Madridit, me britanikun që bëhet blerja e dytë zyrtare në epokën Alonso. Los Blancos kanë njoftuar në rrjetet sociale se mbrojtësi anësor ka firmosur një kontratë deri në qershor të 2031-it, ndërsa cilësohet një ndër futbollistët me më tepër potencial në atë repart. 26-vjeçari ishte pjesë e Liverpool aty ku ka fituar 9 trofe, mes tyre Premier Leaguen 2 herë dhe Champions League.

Ai pritet të jetë në dispozicion të trajnerit Xabi Alonso që në botërorin e klubeve që nis më 14 qershor në Shtetet e Bashkuara të Amerikës. Lëvizje në merkato janë bërë dhe nga skuadra të tjera si Manchester City apo Bayern. Qytetarët kanë arritur akordin me mesfushorin e Milanit, Tijjani Reijnders për një vlerë prej 70 milionë eurosh. Oferta e parë prej 60 milionë euro u refuzua nga kuqezinjtë, të cilët më pas arritën akordin me drejtuesit e Manchester Cityt.

Bayerni i Mynihut njoftoi se Jonathan Tah, mbrojtësi gjerman është blerja më e re, ndërsa klubi vijon tratativat me sulmuesit Eze dhe Leao, ku priten zhvillime. Merkato ende nuk ka nisur zyrtarisht, por skuadrat kanë projektuar listat me lojtarët që dëshirojnë.