Presidenti i Sllovenisë vizitë në Prishtinë: Jemi kundër ndryshimit të kufijve në Ballkan

Presidenti i Sllovenisë, Borut Pahor vizitoi të enjten Kosovën, ku u takua me homologen Vjosa Osmani. Kjo vizitë vjen pas publikimit të dokumenteve jo-zyrtare që supozohen të kenë dalë nga shteti slloven, lidhur me ndryshimin e kufijve në Ballkan.

Pas takimit me Osmanin, Pahor ka deklaruar se ai është tërësisht kundër kësaj ideje, dhe se do t’i kërkojë Bashkimit Evropian të përparojë me procesin e integrimit të rajonit, në mënyrë që të shmangen të tilla mendime.

Një qëndrim të tillë, presidenti slloven e parashtroi edhe në vizitën e tij në Tiranë. Ndërkaq, sa i përket dialogut mes Kosovës dhe Serbisë, presidenti slloven kërkoi që institucionet e reja të Kosovës të mos e ndalin procesin, ndërsa shtoi se Sllovenia do të donte të shihte hapa pozitivë lidhur me këtë çështje, kur të marrë presidencën e Bashkimit Evropian.