Rivlerësimi i pronave do bëhet me tatim 5%, shpallen edhe çmimet e referencës

Qeveria hap rrugën për një tjetër proces rivlerësimi të pasurive të paluajtshme. Nga 1 janari deri më 30 shtator 2026, qytetarët dhe bizneset do të kenë mundësinë të rivlerësojnë pronat e tyre, me një normë tatimore më të ulët nga ajo që apilkohet sot.

Në propozimin e hedhur për konsultim publik, parashikohet që tatimi për shitjen e shtëpisë, të mos jetë 15%, por 5% për një periudhë 9-mujore, ndërsa ligji do të përfshijë edhe pasuritë që janë në proces regjistrimi apo legalizimi.

Po ashtu, Ministria e Financave ka shpallur edhe çmimet e referencës në gjithë Shqipërinë, me përjashtim të Tiranës, ku bie në sy se që nga viti 2019 ka një rritje të konsiderueshme të tyre, ku arrijnë deri në 200 mijë lekë metri katror në Durrës dhe Sazan.

Rritja e vazhdueshme e çmimeve të banesave gjatë këtij 5-vjeçari është një nga arsyet kryesore që ka shtyrë qeverinë të ndërmarrë këtë hap.

Sipas Bankës së Shqipërisë, tregu i pasurive po pëson ndryshime të shpejta, ndaj përditësimi i vlerës së pronave konsiderohet i domosdoshëm si për qëllime fiskale ashtu edhe për planifikimin urban.