Zbulohet varreza 100 mijë vjeçare në Izrael, një nga më të vjetrat në botë

Arkeologët besojnë se kanë zbuluar një nga varrezat më të vjetra të njohura, që daton midis 100,000 dhe 110,000 vjet më parë, në Shpellën Tinshemet në Izraelin qendror.

Mbetjet e njerëzve të hershëm ishin vendosur me kujdes në gropa në pozicionin e fetusit, së bashku me objekte të tilla si fragmente shkëmbinjsh, kocka dhe gurë, të cilat tregojnë ritualet e hershme dhe besimet shpirtërore, raporton AP.

Këto objekte, disa prej të cilave u sollën nga vende qindra kilometra larg, nuk kishin asnjë funksion praktik të njohur në jetën e përditshme, kështu që besohet se ato ishin pjesë e ritualeve që synonin nderimin e të vdekurve.

Ky zbulim konfirmon se varrimet ishin një praktikë e zakonshme në atë periudhë.

Vendndodhja është veçanërisht e rëndësishme sepse mbetjet janë ruajtur jashtëzakonisht mirë falë kushteve specifike të tokës dhe pranisë së hirit.

Disa nga gjetjet kryesore nga Tinschemt u botuan në mars të këtij viti në revistën Nature Human Behavior.

U gjetën dy skelete të plota dhe tre kafka, por ende nuk është e qartë se cilit lloj njerëzish i përkisnin – Homo sapiens, Neandertalë apo ndonjë popullsie të përzier.

LEXONI GJITHASHTU:

• Zbulohet qyteti i lashtë peruan i ndërtuar më shumë se 3 mijë vjet më parë
• Zbulohet detaji tronditës para tragjedisë ajrore të Boeing 787