Shefi i Agjencisë Bërthamore: Inspektorët e OKB-së do kthehen në Iran

Shefi i Agjencisë Ndërkombëtare për Energji Atomike (IAEA), Rafael Grossi, ka thënë të premten se është i “inkurajuar” që Irani është pajtuar për të pranuar një delegacion të vëzhguesve të kësaj agjencie të Kombeve të Bashkuara për të vizituar shtetin “brenda javësh”.

Grossi ka thënë se vizita e ekipit teknik mund të hapë rrugën që inspektorët e OKB-së të kthehen në Iran, potencialisht këtë vit.

“Nëse nuk rikthehemi shpejt, do të ketë probleme serioze, sepse ky është obligim ndërkombëtar i Iranit”, ka thënë Grossi për gazetarët gjatë një vizite në Singapor.

“Jam i inkurajuar nga ajo që kam dëgjuar nga Teherani në aspektin që ata duan të riangazhohen me ne”, ka thënë ai.

Data e vizitës nuk është konfirmuar ende, por Grossi e ka konfirmuar se do të ndodhë “brenda javësh”.

Zëvendësministri i Jashtëm iranian, Kazem Gharibabadi u ka thënë Kombeve të Bashkuara në Nju Jork një ditë më parë se një delegacion i Agjencisë Ndërkombëtare për Energji Atomike do të mund ta vizitojë Iranin brenda dy-tre javësh.

Grupi nuk do të ketë qasje në zonat bërthamore, ka thënë Gharibabadi, duke shtuar se vizita do të fokusohet në krijim të lidhjeve të reja me agjencinë.

Ky zyrtar iranian i ka bërë deklaratat në prag të negociatave që do të zhvillohen të premten në Stamboll mes Iranit, Francës, Britanisë dhe Gjermanisë.

Vendet perëndimore janë duke kërcënuar me sanksionim të Iranit, nëse nuk iu rikthehet zotimeve të bëra në marrëveshjen bërthamore.

Nëse shtetet evropiane do të vendosin sanksione, “ne do të përgjigjemi, ne do të reagojmë”, ka thënë Gharibabadi.

LEXONI GJITHASHTU:

• Presidenti iranian plagoset nga një sulm ajror izraelit
• OKB: Qindra mijëra afganë detyrohen të largohen nga Irani