Pakt ushtarak Britani-Australi, bashkëpunim për prodhimin e nëndetëseve bërthamore

Mbretëria e Bashkuar dhe Australia njoftuan të premten se do të nënshkruajnë një traktat bashkëpunimi për të prodhuar nëndetëse australiane me fuqi bërthamore.

Sekretari britanik i Mbrojtjes, John Healey dhe ai i Jashtëm, David Lammy u takuan me homologët australianë Richard Marles dhe Penny Wong në Sidnej për takimin e përvitshëm.

Marles tha se ai dhe Healey do të nënshkruajnë të shtunën një traktat 50-vjeçar që do të përcaktojë bashkëpunimin për prodhimin e nëndetëseve të flotës australiane, me ndihmën e teknologjisë bërthamore të Shteteve të Bashkuara.

“Është një traktat po aq domethënës sa ishte ai i nënshkruar nga dy vendet që nga koha e federatës”, deklaroi Marles, duke iu referuar unifikimit të kolonive të shumta britanike për të formuar qeverinë Australiane në vitin 1901.

Në vitin 2021, Britania, Australia dhe Shtetet e Bashkuara nënshkruan marrëveshjen e njohur AUKUS, për t’i bërë ballë fuqisë ushtarake në rritje të Kinës.

Në bazë të saj, Uashingtoni duhet ta furnizojë Australinë me 8 nëndetëse, përfshirë disa të dorës së dytë të klasit “US Virginia”.

Por sekretari amerikan i Mbrojtjes, Pete Hegseth po e rishikon marrëveshjen AUKUS, e nënshkruar nga administrata e mëparshme e drejtuar nga Joe Biden.

Kjo ka bërë që të ngrihen shqetësime se Amerika nuk do të japë nëndetëset e saj brenda vitit 2030, për shkak të prapambetjes në programin e saj për prodhimin e këtyre mjeteve.

Rrjedhimisht, Mbretëria e Bashkuar dhe Australia kanë vendosur të nxisin bashkëpunimin dypalësh.

LEXONI GJITHASHTU:

• Franca dhe Gjermania arrijnë marrëveshje për “tanket e së ardhmes”
• Ukraina “fsheh” tanket amerikane Abrams, si po i godet dhe shkatërron Rusia