M.Mbrojtjes: 26 korriku dita me rrezikun më të lartë të zjarreve në gjithë vendin

Ministria e Mbrojtjes ka paralajmëruar për rrezik maksimal zjarresh në të gjithë territorin e vendit për datën 26 korrik, duke iu referuar të dhënave nga Agjencia Kombëtare e Mbrojtjes Civile, IGJEUM dhe Qendra e Koordinimit të Emergjencave Civile të BE-së.

Në një njoftim zyrtar, Ministria bën me dije se Komiteti i Mbrojtjes Civile u ka kërkuar të gjitha institucioneve të rrisin gatishmërinë dhe të forcojnë bashkëpunimin ndërinstitucional për përballimin e situatës së pritshme.

“Qytetarët duhet të tregojnë kujdes të shtuar, të shmangin ndezjen e zjarreve në hapësira të hapura dhe të raportojnë menjëherë çdo rast të dyshimtë pranë autoriteteve përkatëse,” thuhet në reagimin e Ministrisë.

Situata paraqitet e rrezikshme për shkak të temperaturave të larta dhe erërave të forta që favorizojnë përhapjen e flakëve.