McLaren dominon kualifikimet Sprint në Belgjikë, Piastri vendos rekord të ri

McLaren siguroi të premten “pole position”-in në kualifikimet Sprint për Çmimin e Madh të Belgjikës, me australianin Oscar Piastri që regjistroi kohën më të shpejtë prej 1 minutë e 40.510 sekondash, duke vendosur një rekord të ri në pistën e Spa-Francorchamps.

Piastri la pas me 477 të mijëtat kampionin në fuqi Max Verstappen me Red Bull, ndërsa shoku i skuadrës, Lando Norris, e mbylli i treti me 618 të mijëtat më shumë se australiani.

Charles Leclerc me Ferrari u rendit i katërti, 768 të mijëtat pas vendit të parë, ndërsa befasia e kualifikimeve ishte Esteban Ocon i Haas, i cili do niset nga rreshti i tretë përkrah Carlos Sainz të Williams.

Në zonën e pikëve u pozicionuan gjithashtu Oliver Bearman dhe Pierre Gasly me Alpine, ndërsa dhjetëshja u plotësua nga dy të rinjtë Isack Hadjar (Racing Bulls) dhe Gabriel Bortoleto (Sauber), ky i fundit duke vazhduar të bindë me paraqitjet e tij.

Ndërkohë, kualifikimet rezervuan një tjetër surprizë, me eliminimin e hershëm të Lewis Hamilton dhe Kimi Antonellit në Q1. Të dy pilotët, fitues të “pole position”-eve në garat e mëparshme Sprint të sezonit, pësuan rrotullime të makinës. “Pata një problem në makinë dhe u rrotullova pasi rrota e pasme u bllokua. Mendoj se është hera e parë që më ndodh në karrierën time”, deklaroi Hamilton pas sesionit.

Të shtunën në orën 16:00 pritet zhvillimi i garës Sprint, e cila do përcaktojë edhe nisjen nga “pole position” për garën e së dielës që do zhvillohet në orën 15:00.