Starmer mbështetje për njohjen shtetit palestinez, zbardhet plani britanik

Kryeministri i Mbretërisë së Bashkuar, Sir Keir Starmer, pritet të ndërmarrë hapa konkretë drejt njohjes zyrtare të shtetit palestinez, në kuadër të një plani të ri paqeje për Lindjen e Mesme. Iniciativa, e cila do të diskutohet këtë javë në një mbledhje urgjente të kabinetit qeveritar, synon të vendosë Britaninë në një rol aktiv për zgjidhjen e krizës në Gaza dhe krijimin e një paqeje të qëndrueshme në rajon.

Sipas Downing Street, Starmer ka ndarë detaje të planit me presidentin amerikan Donald Trump, në një bisedë që është fokusuar mbi gjendjen humanitare në Gaza. Trump pranoi mungesën ekstreme të ushqimit në rajon dhe u bëri thirrje autoriteteve izraelite të lejojnë ndihmat humanitare pa pengesa.

Mbështetje për planin e kryeministrit britanik ka ardhur edhe nga presidenti francez Emmanuel Macron dhe kancelari gjerman Friedrich Merz. Të dy liderët evropianë janë shprehur pro përpjekjeve të Starmer për të avancuar drejt një zgjidhjeje politike që përfshin krijimin e një shteti palestinez.

Zyrtarët britanikë pohojnë se megjithëse Starmer ka mbështetur historikisht të drejtën e palestinezëve për shtetësi, ai ka shmangur njohjen e menjëhershme për të mos ndërlikuar negociatat për një armëpushim të qëndrueshëm mes Izraelit dhe Hamasit. Megjithatë, presioni i brendshëm për ta njohur shtetin palestinez po rritet: 7 ministra të kabinetit dhe rreth 130 deputetë laburistë po kërkojnë që kjo njohje të ndodhë zyrtarisht.

“Qytetarët palestinezë duhet të shpërblehen me shtetësi,” u shpreh Peter Kyle, sekretari i shtetit për shkencën.

Zëdhënësi i kryeministrit konfirmoi se qëllimi është ndërtimi i një “plani të qëndrueshëm për paqen”, duke përfshirë bashkëpunimin me aleatët ndërkombëtarë, si SHBA-ja dhe vendet arabe. Planit do t’i jepet formë në ditët në vijim dhe do t’u paraqitet partnerëve strategjikë.

Starmer e përshkroi situatën në Gaza si një “krizë humanitare” dhe deklaroi se njohja e shtetit palestinez “duhet të jetë një nga hapat drejt paqes”, por theksoi se kjo duhet të jetë pjesë e një plani të gjerë që garanton një zgjidhje me dy shtete dhe siguri afatgjatë për të dyja palët.

“Kjo është mënyra për të siguruar që ky hap të jetë realisht i dobishëm për përmirësimin e jetës së atyre që vuajnë,” deklaroi Starmer.

LEXONI GJITHASHTU:

• Papa Leo XIV: Civilët në Gaza po dërrmohen nga uria, po ekspozohen ndaj vdekjes
• Britania dhe 24 shtete të tjera dënojnë vrasjen e qindra banorëve në Gaza