SHBA sanksionon gjyqtarin e Gjykatës së Lartë të Brazilit, Alexandre de Moraes

Departamenti i Thesarit të Shteteve të Bashkuara ka vendosur sanksione ndaj gjyqtarit të Gjykatës së Lartë të Brazilit, Alexandre de Moraes, në kuadër të Aktit Global Magnitsky. Sipas njoftimit zyrtar të shpallur më 30 korrik 2025, de Moraes akuzohet për autorizimin e ndalimeve të padrejta parandaluese dhe për shtypje sistematike të lirisë së shprehjes në Brazil.

Masat ndëshkuese, të miratuara në bazë të Urdhrit Ekzekutiv 13818, parashikojnë bllokimin e aseteve të de Moraes brenda juridiksionit amerikan dhe ndalimin e çdo lloj transaksioni financiar me të nga individë apo entitete amerikane.

Sekretari i Thesarit të SHBA-së, Scott Bessent, deklaroi se “veprimtaria e de Moraes përfaqëson një fushatë shtypjeje përmes censurës, ndalimeve të padrejta dhe ndjekjeve politike,” duke përmendur edhe rolin e tij në procedurat kundër ish-presidentit Jair Bolsonaro.

Në një postim në rrjetet sociale, Sekretari i Shtetit Marco Rubio u shpreh:

“Qeveria e SHBA-së ka vendosur sanksione ndaj gjyqtarit të Gjykatës së Lartë të Brazilit për shkelje të rënda të të drejtave të njeriut. Le të jetë kjo një paralajmërim për të gjithë ata që abuzojnë me pushtetin manteli gjyqësor nuk mund t’ju mbrojë.”

Rubio kishte hequr më herët këtë vit vizën amerikane për de Moraes, si dhe për anëtarët e familjes dhe bashkëpunëtorët e tij të afërt, ndërsa kishte sinjalizuar mundësinë e vendosjes së sanksioneve sipas Aktit Magnitsky një paralajmërim që tani është bërë realitet.

LEXONI GJITHASHTU: 

• Australia ndalon Youtube, masa e qeverisë për të mbrojtur fëmijët nën moshën 16 vjeç

• Zyrtari izraelit thotë se Izraeli “mund të aneksojë pjesë të Gazës”