Australia ndalon Youtube, masa e qeverisë për të mbrojtur fëmijët nën moshën 16 vjeç

Faqja e internetit YouTube do të përfshihet në listën e rrjeteve sociale që do të ndalohen në Australi për fëmijët nën moshën 16-vjeç.

Platforma e publikimit të videove pritej të përjashtohej nga ndalimi që qeveria do t’i bëjë rrjeteve TikTok, Instagram, Facebook, X dhe Snapchat, duke filluar nga dhjetori.

Në kuadër të masës, adoleshentët do të mund të shohin video në YouTube, por do t’u ndalohet të kenë një profil, që kërkohet për të qenë në gjendje të postosh një video, apo të reagosh.

YouTbue, në pronësi të Google, ka argumentuar se nuk duhet të bllokohet, pasi si platformë ofron përfitime dhe vlera për të rinjtë australianë. “Ne nuk jemi një rrjet social”, ka thënë kompania në një deklaratë të publikuar të mërkurën.

Ligjet që po miratohen në Australi po ndiqen me interes të madh nga vende të tjera, me Norvegjinë që ka paralajmëruar një masë të ngjashme dhe Britaninë që po e shqyrton atë.

“Rrjetet social po i shkaktojnë dëme sociale fëmijëve tanë dhe unë dua që prindërit australianë ta dinë se ne po kujdesemi për ta”, ka deklaruar po të mërkurën kryeministri Anthony Albanese.

Ai është shprehur i vetëdijshëm se mbrojtja e fëmijëve kërkon më shumë përpjekje, por ka shtuar se kjo masë do të bëjë diferencën.

Komisionerja australiane për sigurinë elektronike, Julia Inman rekomandoi muajin e kaluar përfshirjen e YouTube në listën e ndalimit, pasi fëmijë të moshave nga 10 në 15 vjeç shihnin në të “materiale të dëmshme”.

LEXONI GJITHASHTU:

• Vrau tre të afërmit e saj me kërpurdha vdekjeprurëse, australianja shpallet fajtore
• Udhëton 1,000 km dhe përdor yjet si busull, njihuni me fluturën australiane