PANDORA| Oficeri gjerman: 18 muaj hetime, shmangëm një mashtrim 10 mln euro

Oficeri gjerman, drejtues i operacionit ndërkombëtar “PANDORA” kundër skemës së mashtrimit me “call center” tha se operacioni i policisë gjermane në bashkëpunim me policinë shqiptare dhe Prokurorinë e Posaçme nisi në prill të vitit të shkuar dhe u mundësua në sajë të përgjimeve intensive.

Hoffman theksoi se në sajë të operacionit u bë e mundur shmangia e një humbjeje prej 10 mln eurosh përmes kësaj skeme mashtrimi.

“Kemi 18 muaj që hetojmë për këtë operacion, ne filluam të përgjonim live 20 telefonata mashtruese. Krijuam një qendër kundër thirrjes për të shmangur një humbje mbi 10 milionë eurosh. Zhvilluam edhe hetime komplekse për të lokalizuar qendrat e thirrjeve, telefonatat vinin nga Shqipëria por dhe Kosova, Serbia, Bosnje Hercegovina dhe Libani”, tha oficeri gjerman.

Hoffman u shpreh se hetimet e përbashkëta treguan për një grup kriminal që vepronin nga Tirana, me persona të përfshirë nga mosha 21 deri 36 vjeç.

Ai nënvijëzoi rëndësinë e bashkëpunimit me autoritetet shqiptare në finalizimin me sukses të këtij operacioni, duke theksuar se provat që sekuestroi SPAK në prill të vitit te kaluar ishin tepër të rëndësishme për të arritur në këtë rezultat.

LEXONI GJITHASHTU:

• Mashtrim kompjuterik përmes call center, 7 të arrestuar në Tiranë
• Të përfituara nga mashtrimi me Call Center, sekuestrohen 4 prona me vlerë 1.2 mln €