Vuçiç largohet parakohe nga Samiti në Slloveni, Osmani: Asgjë dhe askush s’e prek pavarësinë e Kosovës

Takimi i krerëve të shteteve të vendeve të Ballkanit Perëndimor në Bërdo të Sllovenisë ka përfunduar pa miratimin e konkluzioneve nga të gjitha pjesëmarrësit.

Në takimin që vjen si nismë e përbashkët e Sllovenisë dhe Kroacisë, me qëllim për të ndihmuar vendet e rajonit në procesin e integrimeve evropiane, presidenti i Serbisë, Aleksandër Vuçiç është larguar para përfundimit.

Vuçiç është larguar me arsyetimin se kishte programuar takime në selinë e NATO-s në Bruksel, por ndërkohë për gazetarët serbë ka shprehur pakënaqësi lidhur me përfundimet e samitit.

Presidenti serb nuk ka pranuar që të përmendet mos ndryshimi i kufijve në rajon pa përfshirë qëndrimin e Serbisë që ka kërkuar të mos ndryshohen kufijtë e njohur nga OKB, duke nënkuptuar që Kosova të mbetet pjesë e saj.

Në takim morën pjesë presidentja e Kosovës, Vjosa Osmani dhe presidenti i Shqipërisë, Ilir Meta krahas liderëve të vendeve të tjera të rajonit.

Presidentja e Kosovës gjatë fjalës së mbajtur në samit duke folur për perspektivën e BE-së dhe marrëdhënieve fqinjësore në rajon, tha se është e nevojshme që të pranohen ndryshimet që kanë ndodhur.

“Më lejoni që ta shpreh qartë dhe me zë të lartë: Republika e Kosovës si vend i pavarur dhe sovran është një projekt përfundimtar. Nuk ka asgjë dhe askush që mund ta kthejë këtë realitet. Aventurat e rrezikshme për ndryshimin e kufijve duhet të refuzohem vendosmërisht nga të gjithë ne, nëse vërtetë dëshirojmë paqe dhe stabilitet në rajonin tonë”, ka theksuar znj. Osmani.

Presidentja e Kosovës shtoi se Serbia do të duhet të dënojë autorët e krimeve të luftës gjatë regjimit të Millosheviçit pasi në vend të përgjegjësisë po ndodh mohimi dhe revizionizmi historik i asaj që ndodhi gjatë viteve ‘90 në rajon.

“Krimet e kryera nga regjimi i Millosheviçit t’i quajmë me emrin e tyre të vërtetë: Krime lufte, krime kundër njerëzimit dhe gjenocid.  Dhe, më e rëndësishmja është të kërkojmë nga fqinji ynë verior, Serbia, të sjellë para drejtësisë autorët e këtyre krimeve të tmerrshme kundër civilëve të pafajshëm”, deklaroi znj. Osmani.