Koreja e Jugut “sinjal paqeje” me Korenë e Veriut?! Heq altoparlantët në kufi

Koreja e Jugut ka nisur procesin e heqjes së altoparlantëve të propagandës përgjatë kufirit me Korenë e Veriut, në një hap që Seuli e përshkruan si përpjekje për të ulur tensionet mes dy vendeve.

Ministria e Mbrojtjes e Jugut njoftoi se kjo është një “masë praktike që synon lehtësimin e tensioneve”, duke theksuar se ky veprim nuk ndikon në gatishmërinë ushtarake të vendit. Megjithatë, autoritetet nuk dhanë detaje për mënyrën e heqjes së pajisjeve dhe nuk konfirmuan nëse ato mund të riinstalohen në të ardhmen në rast përshkallëzimi të situatës.

Zëdhënësi i Ministrisë, Lee Kyung-ho, sqaroi se para vendimit për çmontim nuk ka pasur asnjë kontakt mes dy Koreve.

Altoparlantët ishin përdorur për transmetimin e propagandës kundër regjimit të Koresë së Veriut dhe këngëve K-pop, një praktikë që kishte zemëruar qeverinë e Kim Jong-un, e cila ka ndërmarrë hapa për të bllokuar ndikimin e kulturës jugkoreane brenda vendit.

Vendimi për t’i fikur altoparlantët vjen pasi qeveria e re liberale e udhëhequr nga presidenti Lee Jae Myung mori detyrën pas zgjedhjeve të parakohshme në qershor.

Presidenti Lee është zotuar të përmirësojë marrëdhëniet me Phenianin dhe të rikthejë dialogun, ndryshe nga paraardhësi i tij konservator, Yoon Suk Yeol, i cili i kishte aktivizuar altoparlantët në qershor të vitit 2024 si kundërpërgjigje ndaj balonave me mbeturina të lëshuara nga Veriu.

Përdorimi i altoparlantëve dhe përshkallëzimi i fushatave të luftës psikologjike në stilin e Luftës së Ftohtë kishin shtuar tensionet në gadishullin korean, tashmë të ndikuara nga programi bërthamor i Koresë së Veriut dhe stërvitjet e përbashkëta ushtarake të Jugut me SHBA-në dhe Japoninë.

Pheniani nuk ka reaguar ende në lidhje me vendimin e fundit të Koresë së Jugut.