Dyshohet se ka rënë nga trageti, autoritetet italiane në kërkim të shtetasit francez

Qendra Kombëtare e Kërkim-Shpëtimit, në bashkëpunim me Forcat e Armatosura, Policinë Kufitare dhe autoritetet italiane, vijon operacionin e gjerë për kërkimin e një pasagjeri të zhdukur nga trageti ndërkombëtar “AKKA”.

Dyshohet se bëhet fjalë për një shtetas francez, i cili ose është vetëhedhur në det, ose ka rënë aksidentalisht pasi nuk është ndjerë mirë gjatë udhëtimit.

Operacioni ka nisur fillimisht nga autoritetet italiane në zonën përreth vendngjarjes, ndërkohë që forcat shqiptare janë përfshirë për të zgjeruar perimetrin e kërkimit, nga Kepi i Stillos në jug deri në grykëderdhjen e Semanit në veri.

Në operacion po përdoren mjete ajrore dhe detare, përfshirë një dron dhe një helikopter të Forcave Ajrore, një anije patrulluese të Forcës Detare, motorë uji dhe mjete të tjera patrullimi të Policisë Kufitare, me një numër të konsiderueshëm efektivësh.

Kërkimi po zhvillohet në bashkëpunim të vazhdueshëm ndërinstitucional dhe ndërkombëtar, duke ndjekur protokollet e kërkim-shpëtimit në det. Deri më tani nuk ka ende rezultate, ndërsa operacioni pritet të vijojë edhe në ditët në vijim, në varësi të kushteve detare dhe zhvillimeve në terren.

LEXONI GJITHASHTU:

• Sarandë|Dyshohet se planifikoi hedhjen në erë të tragetit, lihet në burg Erdion Muho
• Mbytet trageti në Afrikën Qendrore, të paktën 58 të vdekur