Izraeli përgjon palestinezët me ndihmën e Microsoft

Një raport tronditës i publikuar nga “The Guardian”, në bashkëpunim me revistën +972 dhe Israeli Local Call, zbulon se Izraeli po mbështetet tek gjiganti teknologjik Microsoft për të përgjuar masivisht komunikimet telefonike të palestinezëve në Gaza dhe Bregun Perëndimor.

Sipas hetimit, bashkëpunimi nisi në fund të vitit 2021, kur CEO i Microsoft-it, Satya Nadella, u takua me komandantin e Njësisë 8200 njësia elitare e inteligjencës kibernetike të ushtrisë izraelite – në selinë qendrore të kompanisë pranë Seattle-it. Në fokus të takimit ishte krijimi i një hapësire të personalizuar dhe të izoluar në platformën Azure, ku do të ruhej një sasi e madhe e të dhënave sekrete të inteligjencës.

Hetimi tregon se që nga viti 2022, Izraeli ka përdorur këtë infrastrukturë për të ndërtuar një sistem masiv të përgjimit dhe ruajtjes së thirrjeve telefonike palestineze. Kapaciteti i “Azure” lejon regjistrimin e miliona bisedave çdo ditë, duke krijuar një arkiv të gjerë që, sipas burimeve, mund të ruajë rreth një milion telefonata në orë.

Microsoft ka deklaruar për The Guardian se Nadella nuk ka qenë në dijeni të përmbajtjes së të dhënave që do të ruheshin në sistemin cloud të kompanisë. Megjithatë, 11 burime nga brenda Microsoft-it dhe agjencive izraelite ushtarake konfirmojnë përdorimin e “Azure” për mbikëqyrjen e gjerë të komunikimeve palestineze.

Zbulimet ngrejnë shqetësime serioze për etiken teknologjike, të drejtat e privatësisë dhe përfshirjen e kompanive amerikane në sisteme të mbikëqyrjes shtetërore në territore të pushtuara.