Trump përplaset me Netanyahun: Nuk dua të dëgjoj më se uria është gënjeshtër

Një bisedë e tensionuar mes presidentit amerikan Donald Trump dhe kryeministrit izraelit Benjamin Netanyahu ka dalë në dritë, ku dy liderët u përplasën për situatën humanitare në Rripin e Gazës.

NBC News raporton se gjatë një telefonate më 28 korrik, Trump ndërpreu papritur Netanyahu, pasi ky i fundit mohoi ekzistencën e urisë në Gaza. Kryeministri izraelit kishte deklaruar publikisht nga Jerusalemi se “nuk ka uri në Gaza” dhe se kjo krizë ishte një “manipulim propagandistik” nga Hamasi.

Trump, i revoltuar, i tha Netanyahu-së:

“Nuk dua të dëgjoj më se uria është e rreme,” duke shtuar se kishte parë imazhe të fëmijëve që vuajnë nga uria dhe prova nga ndihmësit e tij që dëshmonin për këtë emergjencë humanitare.

Zyra e Netanyahut mohoi kategorikisht incidentin, duke e cilësuar si “lajm absolutisht të rremë” dhe duke mohuar ndonjë përplasje verbale mes dy liderëve.

Ky debat erdhi ndërsa OKB-ja ka paralajmëruar për një krizë të rëndë ushqimore në Gaza, ku shumë familje përballen me mungesë të ushqimit dhe ujit. Ndërkohë, Izraeli mohon se kufizon furnizimet dhe i akuzon grupet palestineze për shpërdorim të situatës.

Pas përplasjes, i dërguari special i SHBA-së për Lindjen e Mesme, Steve Witkoff, u nis në rajon për të koordinuar ndihmën humanitare, ndërsa zyrtarët izraelitë shprehën gatishmërinë për bashkëpunim.

Situata në Rripin e Gazës mbetet një nga temat më të nxehta të politikës ndërkombëtare, me shqetësime të mëdha për fatin e civilëve në mes të konfliktit.