BE dënon sulmin në Gaza, Stano: Siguria e gazetarëve dhe raportimi i paanshëm janë thelbësore

Bashkimi Evropian ka dënuar sulmet e Izraelit ndaj mediave në Gaza. Përmes zëdhënësit Peter Stano, blloku është zotuar se do të dyfishojë përpjekjet për t’i dhënë fund shtimit të dhunës mes ushtrisë izraelite dhe militantëve palestinezë.

“Shkatërrimi i zyrave të mediave është ekstremisht shqetësues dhe siguria e gazetarëve është thelbësore,” deklaroi Peter Stano.

“Media duhet të jetë e aftë të punojë në liri, që të mund të raportojë në mënyrë të pavarur atë çfarë po ndodh dhe kjo është edhe më e rëndësishme sidomos në një situatë konfliktuale, ku raportimi objektiv dhe i paanshëm është kyç,” shtoi zëdhënësi.

Të paktën 198 palestinezë, përfshi këtu edhe 58 fëmijë, dhe 8 izraelitë kanë mbetur të vrarë në këto 8 ditë tensione në Lindjen e Mesme.