Turistët “zbarkojnë” në Vlorë, sezoni arrin kulmin! Mbi 1000 pasagjerë në mëngjes

Porti i Vlorës ka shënuar sot një nga ditët më të ngarkuara të këtij sezoni veror, me shifra rekord si në numrin e pasagjerëve, ashtu edhe të automjeteve që kanë hyrë në territorin shqiptar përmes linjave detare.

Vetëm gjatë mëngjesit janë regjistruar 1,019 pasagjerë dhe 48 anëtarë ekuipazhi, të cilët kanë mbërritur me tragete nga Italia, duke sjellë me vete 267 automjete, përfshirë 2 kampingë, 2 minibusë, 1 autobus dhe 4 motoçikleta. Këto të dhëna e bëjnë këtë ditë më të ngarkuarën për këtë verë në portin jugor të vendit.

Autoritetet portuale bëjnë me dije se fluksi pritet të vijojë edhe në orët e pasdites, kur do të ankorohet një tjetër traget me po kaq pasagjerë dhe mjete, duke e çuar në mbi 2,000 numrin e vizitorëve të huaj dhe emigrantëve që mbërrijnë në Vlorë brenda një dite të vetme.

Ky volum i lartë mbërritjesh është një tregues i qartë i rritjes së interesit për Vlorën si një nga destinacionet më të preferuara turistike të rivierës shqiptare, por edhe i rëndësisë strategjike të portit në lidhjet detare me Italinë dhe rajonin më të gjerë të Mesdheut.

Përballë këtij fluksi në rritje, strukturat portuale dhe autoritetet lokale janë në gadishmëri për të garantuar një përpunim të shpejtë dhe të sigurt të pasagjerëve dhe mjeteve, duke shmangur vonesat dhe duke ofruar shërbim cilësor për vizitorët.

LEXONI GJITHASHTU: 

• Fluks i lartë lëvizjesh në Kapshticë dhe Qafë Thanë
• Vazhdon fluksi në Kakavijë, lëvizën 8300 persona në 24 orë