Juljan Shehu një lider i vërtetë, shënon një tjetër gol me Widzew Lodz

Nëse ka një futbollist që është transformuar në mënyrë të paparashikueshme ai është Juljan Shehu, mesfushori i kombëtares shqiptare që aktivizohet te Widzew Lodz në kampionatin polak.

26-vjeçari po regjistron performance të mrekullueshme duke u kthyer në një lider absolut për ekipin e tij, ndërsa synimi mbetet i njëjtë edhe me ekipin kuqezi. Shehu arriti të gjejë dhe një herë tjetër rrugën e rrjetës me Lodz, ku në minutën e 41’ lëshoi një të majtë në pozicion diagonal duke rikthyer ekuilibrat në përballjen me Wisla Plock.

Paraqitja e Shehut ishte tejet pozitive përgjatë gjithë takimit, ndërsa ndeshja në fjalë u mbyll në barazim 1-1 me Widzew Lodz që e sheh veten në vendin e katër me 7 pikë në 4 ndeshje të luajtura. Një fakt interesant është që në këto duele, Shehu ka realizuar 2 gola dhe dhënë 1 asist, duke konfirmuar jo vetëm formën, por edhe rolin kyç në ekip.

Sa i përket ndeshjes së fundjavës, ai është lojtari më i vlerësuar në skuadrën e tij, ku Flashscore e ka vlerësuar performancën e Shehut me notën 7.8. Aktualisht ai është lojtari më në formë i kombëtares shqiptare, duke konfirmuar se është gati për ndeshjet e shtatorit, aty ku trajneri Sylvinho pritet ta vlerësojë me një rol titullari 26-vjeçarin.

LEXONI GJITHASHTU:

• Al Ahli interesohet për Lionel Messin, dëshiron rikthimin e duelit legjendar
• Gol spektakolar nga Messi në Botrorin e Klubeve, humbet PSG