Rusia: Qëndrimi për përfundimin e luftës në Ukrainë mbetet i pandryshuar

Rusia deklaroi të mërkurën se pozicioni i saj për t’i dhënë fund luftës në Ukrainë nuk ka ndryshuar që nga qershori i vitit të kaluar, kur Presidenti Vladimir Putin vendosi kushtet për një marrëveshje paqeje.

Zëvendëszëdhënësi i Ministrisë së Jashtme ruse, Alexei Fadeev, theksoi për gazetarët se kërkesat e Kremlinit mbeten të njëjtat që u artikuluan nga Putin më 14 qershor 2024 në një fjalim të mbajtur në Ministrinë e Jashtme. Ato përfshijnë:

1. Tërheqjen e plotë të forcave ukrainase nga pjesët e rajoneve të Donetskut, Zaporizhzhisë dhe Khersonit që ndodhen ende nën kontrollin e Kievit;
2. Braktisjen zyrtare nga Ukraina të ambicieve për anëtarësim në NATO;
3. Njohjen e realiteteve të reja territoriale, përfshirë se Krimea, Luhansku, Donetsku, Zaporizhzhia dhe Khersoni janë pjesë e Federatës Ruse;
4. Garantimin e të drejtave për komunitetin rusishtfolës në Ukrainë.

Në deklaratën e tij, Fadeev i cilësoi raportimet mediatike perëndimore se Moska ishte gati të zbutë pozicionin e saj si të pabazuara.

Deklaratat ruse vijnë pak ditë para takimit të paralajmëruar mes Presidentit rus Vladimir Putin dhe Presidentit amerikan Donald Trump, i cili pritet të mbahet të premten në Alaska takimi i parë i nivelit të lartë SHBA-Rusi që nga viti 2021. Tema kryesore e bisedimeve pritet të jetë mundësia e një marrëveshjeje për paqe në Ukrainë.

Trump ka sugjeruar se paqja mund të kërkojë një shkëmbim të territoreve të kontrolluara aktualisht nga të dyja palët.

Rusia kontrollon aktualisht rreth 19% të territorit të Ukrainës, përfshirë të gjithë Krimenë, të gjithë Luhanskun dhe pjesë të mëdha të Donetskut, Zaporizhzhisë dhe Khersonit, si dhe zona të kufizuara në rajonet Kharkiv, Sumi, Mykolaiv dhe Dnipropetrovsk.

Nga ana tjetër, Presidenti ukrainas Volodymyr Zelenskiy ka theksuar se çdo diskutim për kufijtë territorialë duhet të paraprihet nga një armëpushim dhe e ka përjashtuar kategorikisht mundësinë e tërheqjes së trupave nga Donbasi apo heqjen dorë nga linjat mbrojtëse.

Kievi dhe shumica e vendeve të botës vazhdojnë ta njohin integritetin territorial të Ukrainës brenda kufijve të vitit 1991 dhe i konsiderojnë kërkesat e Rusisë si një ultimatum të papranueshëm.

Sipas analizave të fundit, përmbushja e kërkesave të Putinit do të kërkonte që Ukraina t’i dorëzonte Rusisë edhe rreth 21 mijë kilometra katrorë tokë shtesë.

LEXONI GJITHASHTU: 

• Kryeministri hungarez, Orban: Rusia e ka fituar luftën në Ukrainë
• Organizata ukrainase denoncon: Rusia katalog me fëmijët e rrëmbyer nga Ukraina