Të paktën 44 të vdekur nga përmbytjet në Kashmir, operacionet e shpëtimit vazhdojnë

Përmbytjet e shkaktuara nga reshjet e dendura të shiut në pjesën indiane të Kashmirit kanë marrë të paktën 44 jetë njerëzish, thanë sot autoritetet lokale, ndërsa ekipet e shpëtimit kërkojnë të mbijetuar, me më shumë se 200 njerëz të shpëtuar nga zonat e prekura nga përmbytjet deri më tani.

Pasi stuhia goditi një pjesë të rajonit, ku përmbytjet dhe rrëshqitjet e dheut shkaktuan katastrofë, zyrtari i Autoritetit të Menaxhimit të Fatkeqësive, Mohammad Irshad, tha se të paktën 50 persona rezultojnë të zhdukur dhe besohet se janë përfshirë nga përmbytjet e menjëhershme.

Ministri federal i Indisë për shkencën dhe teknologjinë, Jitendra Singh, paralajmëroi se katastrofa mund të shkaktojë humbje “të konsiderueshme” jetësh, raporton AP.

“Përmbytjet e zgjatura shkatërruan kuzhinën kryesore, e cila ishte shtëpia e më shumë se 200 pelegrinëve, si dhe qindra automjete dhe motoçikleta”, tha zyrtari lokal Sushil Kumar Sharma.

Ai shtoi se të paktën 50 persona u shpëtuan, shumë prej të cilëve u nxorën nga përrenjtë nën baltë dhe rrënoja, të plagosur rëndë dhe aktualisht po trajtohen në spitalet lokale.

Fshati Chosit, i vendosur në një zonë të largët malore të distriktit Kishtwar, është vendbanimi i fundit në rrugën e një pelegrinazhi vjetor hindu në një faltore malore në një lartësi prej 3,000 metrash, rreth tetë kilometra larg fshatit.

Frikësohet se shumë pelegrinë që ishin në zonën e goditur nga fatkeqësia gjatë pelegrinazhit, i cili filloi më 25 korrik dhe është planifikuar të zgjasë deri më 5 shtator, janë midis të prekurve.

LEXONI GJITHASHTU:

• Reshjet shkaktojnë rrëshqitje dheu dhe përmbytje masive në Indi, mbi 100 të zhdukur
• 31 të vdekur në azilin e pleqve të goditur nga përmbytjet në Pekin