Agjencitë e OKB-së, raport të përbashkët për Gazën: 500 mijë njerëz në rrezik

Kriza e urisë në Qytetin e Gazës dhe rrethinat e tij është konfirmuar për herë të parë nga agjencitë e OKB-së, të cilat kanë dalë me një raport të përbashkët.

Katër agjenci të organizatës, përfshirë UNICEF dhe Organizatën Botërore të Shëndetësisë, kanë përsëritur thirrjen për armëpushim të menjëhershëm dhe për lejimin pa pengesa të ndihmave humanitare, për të kufizuar vdekjet nga uria dhe kequshqyerja.

Sipas agjencive, mbi 500 mijë njerëz në Rripin e Gazës po përballen me vdekjen nga uria, si dhe me kushte katastrofike, përmasat e të cilave pritet të zgjerohen.

Nga ana e saj, Ministria e Jashtme izraelite ka hedhur poshtë raportin, duke thënë se në enklavën palestineze nuk ka krizë urie.

Por sekretari i përgjithshëm i Kombeve të Bashkuara, Antonio Guterres ka thënë se kriza është një katastrofë e shkaktuar nga dora e njeriut dhe ka përsëritur thirrjen për akses të pakufizuar të ndihmave humanitare.

Raporti vjen pak ditë pasi kryeministri Benjamin Netanyahu njoftoi aprovimin e planit për pushtimin total të Qytetit të Gazës.

Forcat Mbrojtëse Izraelitëve kanë bërë të ditur se kanë njoftuar mjekët dhe punonjësit e spitaleve që të evakuojnë pacientët përpara se ofensiva të zgjerohet.

Ndërkohë, ministri hebraik i Mbrojtjes ka paralajmëruar se Qyteti i Gazës do të rrafshohet i tëri nëse Hamas nuk pranon të lirojë të gjitha pengjet.

LEXONI GJITHASHTU:

• Rritet numri i të vdekurve nga lufta në Gaza
• Të paktën 17 të vrarë nga sulmet ajrore izraelite në Gaza