Dorëhiqet ministri: Zgjedhja e Bashës si kryeparlamentar nuk përputhet me idealet

Liburn Aliu njoftoi të mërkurën dorëheqjen nga posti i ministrit në detyrë në Qeverinë e Kosovës, pas zgjedhjes së Dimal Bashës në krye të Kuvendit të Kosovës një ditë më parë.

Aliu shpjegoi se dorëheqja e tij lidhet drejtpërdrejt me këtë ngjarje, duke theksuar se zgjedhja e kryetarit të Kuvendit nuk përputhet me idealet për Republikën që ai ka mbrojtur gjatë angazhimit të tij politik.

Në postim Aliu shkruan:

“Të dashur qytetarë, dua t’ju njoftoj që sapo i dorëzova Kryeministrit të Republikës së Kosovës, z. Albin Kurti, letrën e dorëheqjes sime nga detyra e Ministrit në Ministrinë e Mjedisit, Planifikimit Hapësinor dhe Infrastrukturës.

Dorëheqja ime vjen pas zgjedhjes së djeshme të kryetarit të Kuvendit të Republikës së Kosovës.

Pas votimit për kryetar, e informova Kryeministrin Kurti për vendimin tim.

Konsideroj se zgjedhja e djeshme e kryetarit të Kuvendit, institucionit më të lartë ku miratohen ligjet dhe jepet llogari qeveria, nuk është në frymën dhe lartësinë e idealit për Republikën, që mbetet arsyeja kryesore e angazhimit tim”, shkroi ai.