Zaev në Bruksel: Negociatat për pranimin e Maqedonisë së Veriut të nisin sa më shpejt

Negociatat e pranimit të Maqedonisë së Veriut duhet të fillojnë menjëherë ashtu siç ka premtuar me kohë Bashkimi Europian, kështu ka deklaruar kryeministri i Maqedonisë së Veriut në takimin e zhvilluar në Bruksel me liderët e Ballkanit Perëndimor.

Ai tha se vinte në Bruksel me mesazhe që udhëheqësit e institucioneve të BE-së i dinë, i kuptojnë, i miratojnë dhe shtoi se tani është koha që BE-ja të realizojë atë që premtoi pa më shumë vonesë.

 “Republika e Maqedonisë së Veriut ka përfunduar të gjitha detyrimet e saj. Komisioni e njohu përparimin në raportet e tij dhe ua bëri të qartë shumë udhëheqësve të vendeve anëtare se vendi (ynë) ka një rekomandim të pakushtëzuar për të filluar negociatat,”- u shpreh Zaev.

Kryeministri i Maqedonisë së Veriut theksoi se ai pret një vendim për të miratuar kornizën negociuese, duke mbajtur Konferencën e parë ndërqeveritare gjatë presidencës portugeze të bllokut.

 “Përfaqësuesit e BE-së e dinë dhe e kuptojnë që identiteti ynë maqedonas dhe gjuha maqedonase nuk janë dhe nuk mund të jenë kurrë temë për negociata,” – tha Zoran Zaev.

Në Dhjetor të vitit të kaluar, Sofja vuri veton kundër miratimit të kuadrit negociator dhe fillimit të negociatave të Bashkimit Europian me Shkupin, duke shpjeguar se Maqedonia e Veriut nuk e përmbush marrëveshjen për fqinjësi të mirë dhe gjithashtu parashtroi kërkesën për të njohur rrënjët bullgare të identitetit dhe gjuhës maqedonase.

LEXONI GJITHASHTU: 

• Qeveria bullgare nuk ndryshon veton ndaj RMV-së
• “Asnjë ndërhyrje në identitetin tonë”, Zaev: Pres ende që Bullgaria të heqë dorë nga vetoja ndaj RMV
• Zef Mazi në RMV: Shtyrjet për mbajtjen e Konferencës së Parë Ndërqeveritare shtojnë lodhjen