“Rusia do mbetet kërcënimi ynë”- Merz prezanton reformën për forcat e armatosura

“Rusia është dhe do të mbetet për një kohë të gjatë kërcënimi më i madh për lirinë, paqen dhe stabilitetin në Evropë. Ndaj këtij kërcënimi, qeveria federale do të reagojë me vendosmëri”.

Deklarata është bërë nga kancelari gjerman Friedrich Merz në përfundim të një mbledhjeje të ekzekutivit, ku ka prezantuar masat për modernizimin e shërbimit ushtarak.

Merz ka njoftuar gjithashtu ngritjen e Këshillit Kombëtar për Sigurinë. “Në Gjermani ky projekt është përfolur për 30 vjet. Ndërsa ky koalicion e bëri realitet pas 4 muajsh”, ka thënë kancelari.

I pranishëm në konferencën për shtyp, ministri gjerman i Mbrojtjes, Boris Pistorius ka theksuar se vendi ka nevojë për një ushtri të fortë sa i takon aspektit të personelit.

“Vetëm kështu mbrojtja do të mund të jetë e besueshme përballë Rusisë. Një ushtri e fortë në aspektin e personelit dhe pajisjeve është mjeti i duhur për parandalimin e luftërave”, ka thënë Pistorius.

Ai ka saktësuar se reforma synon të rrisë efektivët e forcave të armatosura me kriterin e rekrutimit vullnetar, por në rast se kjo masë nuk do të rezultojë efikase, qeveria do të aplikojë edhe rekrutimin e detyrueshëm.

Ministri u është drejtuar edhe të rinjve. “Secili prej tyre duhet të vendosë ndryshe nga sa bëhej në të kaluarën për mënyrën se si do të kontribuojë për sigurinë e vendit ku jetojmë. Duhet të marrë përsipër përgjegjësinë dhe të pyesë veten cilën detyrë të mbulojë”, ka shtuar Pistorius.

Aktualisht forcat e armatosura gjermane kanë një personel prej 63 mijë vetash dhe qeveria synon të investojë 350 miliardë euro deri në vitin 2041 për rritjen e numrit dhe modernizimin.

LEXONI GJITHASHTU:

• Trump: Nëse dikush vret në Washington, do dënohet me vdekje
• Trump mesazh Kinës: Duhet të na japin magnete, ndryshe do vendosim tarifa 200%