Vuçiç: Kroacia, Kosova e Shqipëria po krijojnë aleancë ushtarake kundër Serbisë

Presidenti serb Aleksandër Vuçiç akuzoi sot Kroacinë, Shqipërinë dhe Kosovën për krijimin e një aleance ushtarake “kundër Serbisë”, por pohoi se ushtria serbe është mjaft e fortë për të penguar çdo agresor të mundshëm.

“Nuk ishte rastësi që Prishtina, Zagrebi dhe Tirana formuan një aleancë ushtarake. Dhe ata nuk e bënë për shkak të Austrisë, Hungarisë apo Sllovenisë, por për shkak të Serbisë… Pse po na detyroni të pretendojmë se jemi më budallenj se jemi? Ne nuk jemi budallenj që nuk e kuptojnë pse e bëtë”, u tha Vuçiç mediave në Pekin, raporton agjencia Beta.

Vuçiç nuk tha se për cilën aleancë po i referohej, por ndoshta po i referohej deklaratës mbi bashkëpunimin në mbrojtje të nënshkruar nga Kroacia, Shqipëria dhe Kosova në mars, shkruan KosovaPress.

Dokumenti thotë se bashkëpunimi synon stabilitetin dhe sigurinë në Evropën Juglindore, mbështetjen për rrugën euroatlantike dhe forcimin e aleancës së tre vendeve mike.

Vuçiç tha se Serbia “nuk do të prekë askënd”, por po forcon ushtrinë e saj për të mbrojtur integritetin e saj territorial.

LEXONI GJITHASHTU:

• Vuçiç: Plenkoviç po synon të dëmtojë imazhin e Serbisë
• Ministrit të Brendshëm të Serbisë i dërguan tre plumba si kërcënim, reagon Vuçiç