Vritet me armë zjarri një 43-vjeçar shqiptar në Kanada, baba i dy fëmijëve

Një ngjarje e rëndë është shënuar në Toronto, Kanada, ku një 43-vjeçar me origjinë nga Shkodra është vrarë me armë zjarri. Viktima është identifikuar si Paulin Harusha, baba i dy fëmijëve.

Sipas autoriteteve kanadeze, trupi i pajetë i Harushës u gjet brenda një automjeti pranë zonës Victoria Park Avenue dhe Meadowacres Drive, pak para mesnatës së së shtunës. Autorët e dyshuar janë larguar nga vendngjarja me një makinë tip SUV me ngjyrë të çelët, përpara se të mbërrinin oficerët e policisë.

Në një deklaratë për mediat të dielën, Inspektori Jonathan Rose nga Shërbimi i Policisë së Torontos bëri me dije se motivi i krimit mbetet ende i paqartë. Ai shtoi se hetimet janë në vijim, ndërsa autoritetet u bëjnë thirrje qytetarëve që kanë informacion të ndihmojnë hetimet duke kontaktuar policinë.

Familjarët dhe komuniteti shqiptar në Toronto janë tronditur nga ngjarja, ndërsa pritet që në ditët në vijim të hidhet më shumë dritë mbi këtë krim të rëndë.

LEXONI GJITHASHTU:

• Kanadaja do të heqë shumë nga tarifat hakmarrëse ndaj SHBA-së
• Trump: Marrëveshja tregtare me Kanadanë, e vështirë pas mbështetjes për Palestinën