EMRI| Shiste kokainë dhe kanabis në lokalet e Korçës, arrestohet 34-vjeçari

Policia e Korçës ka arrestuar një person që shiste kokainë e kanabis në lagje dhe në lokale të ndryshme të qytetit të Korçës.

Shërbimet e Forcës së Posaçme “Shqiponja” ushtruan kontroll në një automjet, pasi dyshohej se në këtë automjet lëvizte personi i dyshuar për shitje të narkotikëve.

Gjatë kontrollit të automjetit dhe kontrollit fizik ndaj shtetasit Petrika Treska, shërbimet e Policisë gjetën dhe sekuestruan një sasi lënde të dyshuar narkotike, kokainë, të ndarë në doza, gati për shitje. Në vijim të veprimeve, gjatë kontrollit në banesat e këtij shtetasi, u gjet një tjetër sasi kokaine dhe kanabisi.

Në përfundim të veprimeve procedurale, specialistët e Sektorit të Narkotikëve arrestuan në flagrancë, për veprën penale “Prodhimi dhe shitja e narkotikëve”, shtetasin Petrika Treska, 34 vjeç, banues në Korçë.

Në bashkëpunim me Prokurorinë vijon puna për identifikimin dhe arrestimin e shtetasve të tjerë që mund të jenë përfshirë në këtë veprimtari kriminale.