Fermeri që kultivon kivin në Peqin tregon se këtë vit pret mbi 20 tonë prodhim

Kultivimi i kivit në vendin tonë është një kulturë pak e njohur, megjithatë familja Meta në Peqin kanë arritur të kultivojnë hektarë të tëra me këtë kulturë. Ndërkohë prodhimi nga viti në vit vjen ne rritje.

“Është viti i dhjetë që unë merrem me kultivimin e kivit. Fillimisht kërkoja të mbillja një bimë që të ishte e veçantë, ndryshe nga ato që kultivohen në zonën tonë. Aktualisht kam 7 dynym të mbjellë me kivi dhe, duke qenë se katër vitet e para kjo bimë kërkon një periudhë për t’u përgatitur derisa të hyjë në prodhim, tani, në vitin e dhjetë, mund të them që janë në fazën e prodhimit të plotë. Kivi është një bimë e lodhshme, sepse kërkon ujë, por nga ana tjetër edhe dëmtohet nëse ka tepër ujë”, thotë Hysen Meta fermer.

Vitin e kaluar ky plantacion prodhoi rreth 20 tonë kivi, ndërsa këtë vit pritet që prodhimi të jetë edhe më i lartë, me frut më të plotë dhe cilësi më të mirë.

“Për prodhimin nuk kam ç’të ankohem, sepse vitin e kaluar arriti rreth 20 tonë, ndërsa këtë vit mendoj se do të jetë edhe pak më mirë se viti i kaluar. Ajo që është e veçantë këtë vit është se prodhimi, edhe si kokërr, është më i mirë dhe më i plotë”, shprehet fermeri.

Megjithëse rezultatet janë pozitive, sfidat për fermerin mbeten të shumta, sidomos në sigurimin e krahut të punës për proceset e rëndësishme bujqësore.

“E vërteta është se pjesën dërrmuese të punës e bëj me bashkëshorten time, por ka edhe procese që nuk arrijmë t’i përballojmë vetëm. Për shembull, gjatë janarit duhet kryer krasitja, që është shumë e vështirë të përballohet pa fuqi punëtore shtesë. Por edhe aty është problem, sepse sa paguhet një punëtor? Tani ka arritur në 5 mijë lekë në ditë, e prapë nuk gjen. E vërteta është se edhe të rinjtë nuk e kanë shumë qejf këtë punë”, thotë Meta.

Kultivimi i kivit, edhe pse ende i rrallë në vendin tonë, po dëshmon se ka potencial për t’u kthyer në një kulturë fitimprurëse. Eksperienca e familjes Meta në Peqin është shembull se si përkushtimi dhe inovacioni në bujqësi mund të sjellin rezultate të prekshme.

LEXONI GJITHASHTU:

• Nutricionisti nuk pi ujë prej vitesh: E marr vetëm nga frutat dhe perimet
• Turqia shton eksportet në Rusi, kryesisht frutat dhe arrat