Franca sekuestron rreth 10 ton kokainë në Gjirin e Guinesë

Marina franceze ka sekuestruar pothuajse 10 ton kokainë në një operacion të zhvilluar të hënën pranë brigjeve të Afrikës Perëndimore, në një nga kapjet më të mëdha të viteve të fundit.

Sipas Prefekturës Detare të Atlantikut, droga u gjet në një anije peshkimi pa flamur në ujërat ndërkombëtare, një metodë e zakonshme për trafikun e paligjshëm në këtë rajon që shërben si rrugë kryesore tranziti për drogën që shkon drejt Evropës.

Operacioni u zhvillua nga dy anije të marinës franceze të vendosura në zonë në kuadër të Operacionit Corymbe, një mision afatgjatë i Francës në Gjirin e Guinesë për të luftuar piraterinë dhe trafikimin.

Në total u sekuestruan 9.6 ton kokainë, me një vlerë të vlerësuar prej 519 milionë eurosh.

Kapja u bë e mundur falë një bashkëpunimi të ngushtë mes institucioneve franceze dhe partnerëve ndërkombëtarë, përfshirë Zyrën Kundër Narkotikëve të Francës (OFAST), Agjencinë Kombëtare të Krimit të Mbretërisë së Bashkuar, si dhe Qendrën për Analizën dhe Operacionet Detare (MAOC-N), që përfshin nëntë vende evropiane.

Admirali Nicolas Vaujour, shefi i marinës franceze, deklaroi se vetëm gjatë tetë muajve të parë të vitit 2025 janë sekuestruar 45 ton kokainë në këtë rajon, duke e cilësuar atë si sasinë më të lartë të regjistruar ndonjëherë në historinë e operacioneve detare franceze.