Homazh për poetin dhe kineastin Petrit Ruka, Tepelena e nderon me një shtatore

Në qendër të qytetit të Tepelenës është përuruar shtatorja e poetit dhe kineastit të mirënjohur shqiptar, Petrit Ruka.

E punuar me finesë dhe mjeshtëri nga skulptori Ilmi Kasemi, shtatorja do të qëndrojë në qytetin ku Ruka lindi dhe u rrit, si një kujtesë e përhershme për kontributin e tij në kulturën shqiptare.

Të pranishëm në ceremoni, akademikë, poetë dhe studiues vlerësuan figurën shumëplanëshe të Petrit Rukës dhe ndikimin e tij në letërsi, art dhe kinematografi.

“Petrit Ruka i takon pikërisht trashëgimisë shpirtërore, kulturore, artistike – jo vetëm të Tepelenës, ku ai sot nderohet me një gjest shumë të veçantë përmes ngritjes së shtatores së tij, por edhe gjithë Jugut dhe Shqipërisë”, thotë akademiku Ksenofon Krisafi.

“Petrit Ruka përfaqëson një poet atipik në letërsinë tonë, që solli jo vetëm forcën e lirizmit – kryesisht lirizmin historik – por edhe referenca nga baladat popullore, duke sjellë elementin më substancial të folklorit në mënyrën më të kultivuar të mundshme”, thotë publicisti dhe poeti Aleksandër Çipa.

“Si shkrimtar dhe poet, ai u kthye në një nga korifenjtë e letrave shqipe. U nda nga jeta në një moment kur kishte ende shumë për t’i dhënë letërsisë shqiptare”, thotë pedagogu Jaho Canaj.

Petrit Ruka, i ndarë nga jeta në korrik të vitit 2021, është autor i shumë veprave poetike dhe kinematografike që evidentojnë vlerat kombëtare shqiptare dhe që bënë të njohur Tepelenën në mbarë vendin.

LEXONI GJITHASHTU:

• FOTO/ Ky është biznesmeni italian i cili u gjet i vrarë në Tepelenë
• PAMJE/ Protestë në Smokthinë, banorët kërkojnë asfaltimin e 25 km rrugë