Britania me shërbim të ri digjital, Starmer: Spital online, 8.5 mln takime shtesë

Kryeministri britanik Sir Keir Starmer do të njoftojë sot një riorganizim të madh të Shërbimit Kombëtar Shëndetësor (NHS), duke premtuar krijimin e një “spitali online” që synon të përmirësojë aksesin në kujdes shëndetësor dhe të shkurtojë ndjeshëm kohët e gjata të pritjes.

Gjatë fjalimit të tij kryesor në konferencën e Partisë Laburiste, Starmer do të prezantojë planin për një shërbim të ri dixhital, të quajtur NHS Online, që do të lançohet në vitin 2027 si pjesë e vizionit të tij për një Britani “më të drejtë dhe më moderne”.

Platforma do t’u mundësojë pacientëve të:

• Rezervojnë takime mjekësore

• Marrin këshilla klinike të drejtpërdrejta

• Menaxhojnë skanime dhe teste diagnostike

• Porosisin receta mjekësore

• Caktojnë procedura fizike në spitale, qendra kirurgjikale dhe diagnostikuese

Sipas Laburistëve, kjo nismë do të mundësojë deri në 8.5 milionë takime shtesë në NHS gjatë tre viteve të para të implementimit. Po ashtu, pritet të zvogëlojë ndjeshëm vonesat aktuale që kanë rënduar sistemin shëndetësor pas pandemisë.

Duke e cilësuar këtë hap si “një kapitull të ri në historinë e NHS-së sonë”, Starmer do të theksojë se kjo platformë dixhitale shënon fillimin e një revolucioni teknologjik në kujdesin shëndetësor dhe do të ndihmojë në rikthimin e besimit të qytetarëve në shërbimet publike.

LEXONI GJITHASHTU:

• Erdogan çmon përpjekjet e Trumpit për t’i dhënë fund luftës në Gazë
• “Aktivitetet imorale”, Talebanët ndërpresin internetin në Afganistan