15 fëmijë të sëmurë nga Gaza evakuohen në Itali për t’u kuruar

15 fëmijë të sëmurë nga Gaza dhe familjet e tyre zbritën në Itali të hënën në mbrëmje për t’u trajtuar në spitale.

Evakuimi mjekësor është pjesë e një përpjekjeje diplomatike të qeverisë italiane për të ofruar ndihmë mjekësore për fëmijët që janë plagosur gjatë luftës ose që nuk mund të trajtoheshin për shkak të shkatërrimit të shumicës së spitaleve në Gaza.

“I kontrolluan, verifikuan nëse mund të transportoheshin, dhe u bë gjithashtu një kontroll edhe për anëtarët e familjes”, tha  Gjeneral Giovanni Maria Iannucci, Komandant i Qendrës së Koordinimit të Forcave Ushtarake Italiane.

Pacientët e vegjël vuajnë nga sëmundje dhe trauma të ndryshme dhe u shoqëruan nga 66 të afërm, në bord të tre avionëve C-130 të forcave ajrore italiane.

Sipas Ministrisë së Jashtme të Italisë, gjithsej 196 fëmijë dhe 454 anëtarë familjesh kanë mbërritur në Itali si pjesë e programit të evakuimit mjekësor nga Gaza.

Qeveria italiane planifikon gjithashtu të presë 72 studentë në Itali si pjesë e një programi trajnimi në ditët në vijim.

LEXONI GJITHASHTU:

• Netanyahu: Autoriteti Palestinez s’mund të qeverisë Gazan pa reformë radikale
• Trump i kërkon Hamasit të pranojë planin e propozuar të paqes në Gaza