Pezullohet nga detyra polici në Gjirokastër, dyshohet për shpërdorim detyre

AMP e rajonii Vlorë-Gjirokastër, ka ekzekutuar një urdhër të Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për pezullimin nga detyra të një efektivi policie këtë premte

Bëhet fjalë për nënkomisarin DH. Ç., i cili në kohën e kryerjes së veprës penale ushtronte funksionin e Shefit të Seksionit për Hetimin e Krimeve në Volum pranë Komisariatit të Policisë Përmet.

Prokuroria ka caktuar ndaj tij masën e sigurisë “pezullim i ushtrimit të një detyre apo shërbimi publik”, ndërsa ai dyshohet për kryerjen e veprës penale “Shpërdorim i detyrës”.

Masat janë marrë në vijim të hetimeve të thelluara të nisura në kuadër të një procedimi penal të vitit 2025, ku, sipas burimeve zyrtare, gjatë marrjes së deklarimeve dhe veprimeve të tjera hetimore kanë dalë dyshime të arsyeshme për shkelje të kryera nga oficeri i policisë.

Hetimet vijojnë për zbardhjen e plotë të rrethanave si dhe për identifikimin e mundshëm të personave të tjerë të përfshirë në këtë veprimtari të dyshuar kriminale.