Von der Leyen përshëndet marrëveshjen, BE premton ndihma për rindërtimin e Gazës

Presidentja e Komisionit Evropian, Ursula von der Leyen, përshëndeti këtë të enjten marrëveshjen për sigurimin e një armëpushimi dhe lirimin e pengjeve në Gaza, si dhe përgëzoi përpjekjet diplomatike të Shteteve të Bashkuara, Katarit, Egjiptit dhe Turqisë.

Sipas saj, të gjitha palët duhet t’i përmbahen plotësisht kushteve të marrëveshjes.

“Të gjithë pengjet duhet të lirohen në mënyrë të sigurt. Duhet të vendoset një armëpushim i përhershëm. Vuajtjet duhet të marrin fund”, shkroi ajo në rrjetet sociale, duke shtuar se BE-ja do të vazhdojë të mbështesë shpërndarjen e ndihmave në Gaza dhe është e gatshme të ndihmojë në rindërtim e saj.

Në një postim në platformën X, ajo shkroi:

“E mirëpres njoftimin e një marrëveshjeje për të siguruar një armëpushim dhe lirimin e pengjeve në Gaza, bazuar në propozimin e paraqitur nga Presidenti i SHBA-së”.

Ndërkohë, ajo shtoi se BE-ja do të vazhdojë të mbështesë shpërndarjen e shpejtë dhe të sigurt të ndihmës humanitare në Gaza, dhe se kur të vijë koha, BE do të jetë gati të ndihmojë me rimëkëmbjen dhe rindërtimine Gazës.

“Mundësia e sotme duhet të shfrytëzohet. Është mundësia për të krijuar një rrugë të besueshme politike drejt paqes dhe sigurisë së qëndrueshme”, është shprehur ajo.

LEXONI GJITHASHTU:

• Trump pas marrëveshjes për paqen: Ne do të marrim pjesë në rindërtimin e Gazës