Detaje nga plagosja e kryebashkiakes në Gjermani, dyshohet se u sulmua nga vajza

Një ngjarje e rëndë tronditi qytetin Herdecke në Gjermaninë Perëndimore, ku kryebashkiakja e sapozgjedhur, Iris Stalzer, u gjet në shtëpinë e saj me plagë të shumta thike.

Incidenti ndodhi të martën, më pak se dy javë pas zgjedhjes së Stalzer në krye të bashkisë, më 28 shtator.

Shërbimet e emergjencës u njoftuan pak pas mesditës nga vajza 17-vjeçare e Stalzer, e cila raportoi një tentativë grabitjeje jashtë shtëpisë.

Megjithatë, hetuesit përcaktuan se sulmi kishte ndodhur brenda banesës, dhe në vendngjarje u gjetën dy thika dhe rroba të dyshuara si pjesë e sulmit.

Policia arrestoi vajzën 17-vjeçare dhe djalin 15-vjeçar të Stalzer.

Më vonë, në mbrëmje, vetë Stalzer në dëshminë e saj identifikoi vajzën si autoren e dyshuar të sulmit, tha hetuesi Jens Rautenberg.

Fillimisht, lëndimet u raportuan si kërcënuese për jetën, por më vonë autoritetet konfirmuan se jeta e saj nuk është më në rrezik.

Historia e dhunës në familje

Sipas mediave gjermane, kjo nuk është hera e parë që policia është thirrur në banesën e Stalzer për konflikte familjare.

Transmetuesi publik WDR raportoi se policia ka ndërhyrë disa herë më parë për raportime për dhunë familjare, ndërsa revista Der Spiegel shkruan se në verën e këtij viti, vajza e Stalzer kishte ushtruar dhunë ndaj saj, gjithashtu me thikë.

Për momentin, nuk është konfirmuar ndonjë motiv politik, megjithëse rasti ndodhi në një klimë të tensionuar, ku politikanë të tjerë lokalë gjermanë janë përballur me dhunë në vitet e fundit. Kancelari Friedrich Merz dhe figura të tjera politike e dënuan menjëherë sulmin.

Prokurori Bernd Haldorn deklaroi se çështja po trajtohet si lëndim trupor, dhe autoritetet po punojnë për të liruar fëmijët, duke i dorëzuar ata në kujdesin e Zyrës për Mirëqenien e të Rinjve, e cila do të marrë vendimet e mëtejshme ndërsa hetimi vazhdon.

Stalzer, 57 vjeç, është anëtare e Partisë Socialdemokrate (SPD), e qendrës së majtë, pjesë e koalicionit qeverisës në Gjermani. Ajo pritet të marrë zyrtarisht detyrën si kryebashkiake më 1 nëntor.

LEXONI GJITHASHTU:

• Plagoset me thikë kryetarja e sapozgjedhur gjermane, u zvarrit deri te banesa
• Pse Gjermania e anuloi programin e përshpejtuar të shtetësisë?