Polemikat rreth Izraelit, Austria në dilemë për organizimin e Eurovizionit

Një numër gjithnjë e në rritje zërash nga Partia Popullore Austriake, partia në pushtet, po përpiqen të bindin organizatorët e Festivalit të Këngës Eurovision 2026, që do të mbahet në Vjenë në maj, të mos e presin konkursin në rast se Izraeli përjashtohet nga eventi.

Sipas medias vendase, disa politikanë mbështesin idenë që Austria të tërhiqet nga organizimi nëse Unioni Evropian i Transmetimeve (EBU) ndalon pjesëmarrjen e Izraelit ose e detyron atë të garojë nën flamur neutral — një skemë e ngjashme me atë që u përdor për sportistët rusë në Lojërat Olimpike pas sanksioneve ndërkombëtare.

EBU pritet të marrë një vendim zyrtar për pjesëmarrjen e Izraelit në nëntor, gjatë Asamblesë së Përgjithshme. Deri atëherë, presioni ndërkombëtar është rritur ndjeshëm.

Shtete si Spanja, Holanda, Islanda, Irlanda dhe Sllovenia kanë paralajmëruar se do të tërhiqen nga gara nëse Izraeli lejohet të marrë pjesë.

Austria fitoi të drejtën për të organizuar Eurovisionin 2026 pas fitores së këngëtarit austriak JJ në edicionin e kaluar. Por nëse transmetuesi publik austriak refuzon të realizojë organizimin, ai mund të përballet me një gjobë që arrin deri në 40 milionë euro.

Në raste të tilla, organizimi i konkursit zakonisht i kalon një prej vendeve “sponsore të mëdha”.

Vendimi përfundimtar i EBU-së pritet të ketë ndikim të drejtpërdrejtë në fatin e organizimit të edicionit të vitit 2026 dhe mund të çojë në një krizë të pazakontë për Eurovisionin.