Reagon Irani pas thirrjes së Trump për negociata mbi programin bërthamor

Ministria e Jashtme e Iranit ka reaguar pas deklaratës së Presidentit të SHBA-së Donald Trump, i cili tha ditën e djeshme se mund të negociojë në të ardhmen me Iranin për programin bërthamor.

Ajo ka kritikuar thirrjen e Presidentit Donald Trump për dialog, duke akuzuar Uashingtonin për “sjellje armiqësore dhe kriminale”.

Përgjigja vjen pasi Trump bëri vërejtje në parlamentin izraelit ditën e djeshme rreth gatishmërisë së tij për të arritur një marrëveshje me Teheranin.

Në qershor, SHBA-të iu bashkuan Izraelit në sulmin ndaj objekteve bërthamore iraniane pas pesë raundeve të bisedimeve të tërthorta bërthamore me Teheranin që ngecën për shkak të çështjeve si pasurimi bërthamor i brendshëm.

“Përsëritja e pretendimeve të rreme në lidhje me programin bërthamor paqësor të Iranit nuk mund të justifikojë në asnjë mënyrë krimin e përbashkët të SHBA-së dhe regjimeve sioniste në sulmin ndaj tokës së shenjtë të Iranit dhe vrasjen e bijve të guximshëm të Iranit”, tha Ministria e Jashtme.

SHBA-të ishin “shkaku më i madh i paqëndrueshmërisë dhe pasigurisë në rajon” për shkak të mbështetjes së tyre për pushtimin dhe sulmet izraelite në Gaza, si dhe shitjes së armëve në Lindjen e Mesme, sipas saj.

“Bashkëpunimi dhe pjesëmarrja aktive e Shteteve të Bashkuara në gjenocidin dhe luftënxitjen e regjimit sionist në Palestinën e pushtuar nuk është sekret për askënd, dhe Shtetet e Bashkuara duhet të mbahen përgjegjëse për rolin e tyre në pandëshkueshmërinë e regjimit sionist, duke përfshirë parandalimin e çdo veprimi efektiv kundër Izraelit në Këshillin e Sigurimit të Kombeve të Bashkuara, si dhe sabotimin e proceseve gjyqësore ndërkombëtare për të ndjekur penalisht kriminelët izraelitë,” është shprehur Ministria e jashtme.

LEXONI GJITHASHTU:

• Zelensky do të takohet me Trump-in për miratimin e raketave Tomahawk
• Trump: Marrëveshja e paqes synon rindërtimin e Gazës