Kodi i ri Penal, Bogdani: Kërkon një ekspertizë të gjerë dhe të analizohet në detaje

Kryetarja e Këshillit të Lartë të Prokurorisë, Mirela Bogdani teksa po prezantonte raportin për vitin 2024 në Kuvend ka folur edhe lidhur me draftin e Kodit të ri Penal. Bogdani u shpreh KLP ende nuk ka një qëndrim të qartë teksa shtoi se duhen analizuar detajet.

“Ky ka qenë një proces tërësisht i iniciuar nga Ministria e Drejtësisë. Kemi pritur të kemi një material të cilin mund ta gjykojmë.

Kemi pasur një diskutim informal për qëndrimin që ne si Këshill mund të mbajmë, për qasjen pro apo kundër kodit apo seksioneve të veçanta të tij, sepse duhet një punë e jashtëzakonshme për të analizuar të gjitha ato nene, për të parë direktivat e Bashkimit Europian dhe se si përjashtohen.

Kërkon një ekspertizë të gjerë në kohë dhe burime njerëzore që Këshilli për momentin nuk i ka. Ka nevojë për një vlerësim dhe vendimmarrje për t’u analizuar në detaje”, tha Bogdani.

Ajo u shpreh se KLP nuk ka fuqinë ligjore për të marrë vendime dhe masa për sigurisë në prokuroritë e vendit. Bogdani shtoi se në mbledhjen e përbashkët që do të zhvillohet me Këshillin e Lartë Gjyqësor i cili do të mbahet në dhjetor, do të adresohet kjo problematikë.

“Diskutimi i përbashkët midis KLP dhe KLGJ në dhjetor do të adresojë dhe çështjen e sigurisë. Ndoshta është momenti që këshillat dhe të gjitha institucionet e drejtësisë të bashkëpunojnë dhe të dalin me një plan masash”, shtoi mes të tjerave ajo.