Enver Robelli: Duhet debat i brendshëm dhe jo kërkesa populiste “do padisim Serbinë për gjenocid”

Kryeministri i Kosovës, Albin Kurti, ka thënë se Qeveria e tij do të përgatisë padi kundër Serbisë për gjenocid të kryer gjatë luftës  së fundit në Kosovë. Në “Ilva Now”, Enver Robelli, kryeredaktor i gazetës zvicerane “Tages-Anzeiger”, e paraqiti të vështirë dorëzimin e një padie të tillë.

Ai tha se kjo çështje duhet të kishte më shumë një debat të brendshëm sesa ato që z. Robelli i quajti kërkesa populiste me motivin ‘do të padisim Serbinë’. Ai theksoi se çështja e padisë për gjenocid është serioze dhe mori si shembull Bosnjen, ku vetëm masakra e  Srebrenicës është shpallur gjenocid.

“Krahas pengesave reale që ka Kosova për të dorëzuar padinë, mendoj se duhet parë edhe si kanë shkuar gjërat në Bosnje sa i përket padisë për gjenocid. Në rastin e Bosnjes, vetëm masakra e Srebrenicës është shpallur gjenocid dhe nuk është shpallur rrethimi tre-vjeçar i Sarajevës me 11 mijë viktima”, tha z. Robelli.

Z. Robelli tha se për të provuar gjenocidin, duhet të dëshmohet qëllimi i një shteti për të shfarosur një popullsi të tërë. Ai tha se ndërhyrja e NATO-s mund t’i japë argumente palës serbe për të thënë se nuk ka pasur përpjekje për gjenocid.

“Çështja është se me ndërhyrjen e NATO-s kjo përpjekje për gjenocid është evituar dhe e shoh si shumë të rrezikshme këtë çështje është sepse po vendosi një Gjykatë që nuk ka pasur gjenocid por ka pasur një përpjekje për shfarosje të një popullsie e cila është ndërprerë nga ndërkombëtarët, kjo mund t’i kthehet Kosovës si boomerang”, u shpreh z. Robelli.

LEXONI GJITHASHTU:

• Analistët gjykojnë si thelbësore vendosjen në dialogun me Serbinë njohjen e Kosovës
• Adri Nurellari: Kurti po tenton dialog me Serbinë me ide të shteruara
• Akri Çipa analizon mundësinë që ka Kosova për të paditur Serbinë për gjenocid
• Dialogu Kosovë-Serbi, Robelli: Përfshirja e SHBA mund të përshpejtojë një “zgjidhje të kënaqshme”
• Donika Emini i cilëson konfuze qëndrimet e ministres së Jashtme të Kosovës