BE miraton paketën e sanksioneve kundër Rusisë: Ndalohet importi i gazit të lëngshëm

Vendet e Bashkimit Evropian kanë miratuar paketën e 19-të të sanksioneve kundër Rusisë për shkak të luftës kundër Ukrainës, dhe masat e reja përfshijnë një ndalim të importit të gazit natyror të lëngshëm rus, njoftoi të mërkurën presidenca daneze e BE-së.

“Jemi shumë të kënaqur të njoftojmë se shteti anëtar i mbetur sapo na ka informuar se tani mund të tërheqë kundërshtimet e tij ndaj paketës së 19-të të sanksioneve”, thuhet në deklaratë, sipas Reuters.

Sllovakia ishte vendi i fundit që kundërshtoi futjen e një pakete të re sanksionesh kundër Rusisë, pasi vendet e BE-së ranë dakord për tekstin përfundimtar javën e kaluar.

Kryeministri sllovak Robert Fico kërkoi garanci nga Komisioni Evropian për çmimet e larta të energjisë dhe harmonizimin e objektivave klimatike me nevojat e prodhuesve të makinave dhe industrisë së rëndë.

Ai tha se kërkesat e vendit u përmbushën nga klauzola të reja të shtuara në komunikatën përfundimtare për samitin e udhëheqësve të BE-së nesër.

“Si pasojë, është iniciuar një procedurë me shkrim për miratim nga Këshilli. Nëse nuk paraqiten kundërshtime, paketa do të miratohet nesër deri në orën 8:00 të mëngjesit”, shtohet në deklaratë.

Ndalimi i gazit natyror të lëngshëm (LNG) do të hyjë në fuqi në dy faza: kontratat afatshkurtra do të skadojnë pas gjashtë muajsh dhe kontratat afatgjata nga 1 janari 2027. Ndalimi i plotë vjen një vit përpara planit të Komisionit për t’i dhënë fund varësisë së bllokut nga lëndët djegëse fosile ruse.

LEXONI GJITHASHTU:

• Droni rus godet kopshtin e fëmijëve, Zelensky: S’ka justifikim, Rusia e paturpshme
• Rusia dënon me burgim të gjatë 15 luftëtarë ukrainas të kapur gjatë luftës