Bisedime tregtare dhe deklaratë paqeje/ Momentet kyçe nga vizita e Trump në Azi

Presidenti amerikan Donald Trump ka nisur me ritëm të lartë turneun e tij diplomatik në Azi, duke mbërritur në Malajzi për samitin e ASEAN-it.

Gjatë vizitës, ai ka marrë pjesë në takime të rëndësishme me liderët rajonalë dhe ka mbikëqyrur nënshkrimin e një deklarate paqeje midis Tajlandës dhe Kamboxhias, ndërsa ekipi i tij ka raportuar përparim në negociatat tregtare me Kinën.

Sipas Sekretarit të Thesarit, Scott Bessent, përshkallëzimi i tarifave ndaj Kinës është “jashtë tryezës”, pas bisedimeve që ai i quajti “shumë të mira”. Palët, përfshirë negociatorët kinezë, kanë arritur një “konsensus bazë”, duke ulur tensionet përpara takimit të planifikuar mes Trump dhe presidentit Xi Jinping këtë javë.

Një tjetër moment i rëndësishëm ishte nënshkrimi i deklaratës së paqes mes Tajlandës dhe Kamboxhias, e cila riafirmon armëpushimin e arritur në korrik dhe përfshin angazhime për uljen e tensioneve kufitare. Edhe pse Trump e quajti gabimisht “traktat paqeje”, diplomatët e përfshirë e sqaruan si një deklaratë bashkëpunimi.

Gjatë samitit, SHBA nënshkroi gjithashtu marrëveshje tregtare me Malajzinë dhe Kamboxhian, që përfshijnë qasje të zgjeruar në mineralet kritike, një sektor me rëndësi strategjike për ekonominë amerikane.

Në Kuala Lumpur, Trump zhvilloi edhe një takim me Presidentin brazilian Luiz Inácio Lula da Silva, duke sinjalizuar një ngrohje të marrëdhënieve SHBA–Brazil pas mosmarrëveshjeve të mëparshme.

Vizita e Trump u shoqërua nga pritje festive me flamuj, kërcime tradicionale dhe ceremoni zyrtare, ndërsa udhëheqësit e Azisë Juglindore e përgëzuan për angazhimin e tij .