Turneu në Azi, Trump udhëton drejt Japonisë, takim me kryeministren e sapozgjedhur

Presidenti i SHBA-së, Donald Trump këtë të hënë është nisur nga aeroporti ndërkombëtar i Kuala Lumpur drejt Japonisë. Kjo është ndalesa e dytë e turneut të tij në Azi.  Gjatë vizitës së tij tre-ditore në Japoni, Trump do të zhvillojë bisedime me kryeministren e sapozgjedhur Sanae Takaichi dhe gjithashtu planifikon të takohet me Perandorin Naruhito.

Më pas, ai do të udhëtojë për në Korenë e Jugut për samitin e Bashkëpunimit Ekonomik Azi-Paqësor (APEC). Në Kore Trump pritet të ketë një takim privat me presidentin kinez, Xi Jinping me qëllim arritjen e një marrëveshjeje tregtare midis Uashingtonit dhe Pekinit.

SHBA dhe Malajzia të dielën nënshkruan një marrëveshje për tregti reciproke. Kamboxhia dhe Malajzia nënshkruan gjithashtu marrëveshje reciproke tregtare me SHBA-në që përfshijnë aksesin në metale të rralla kritike.

Sipas marrëveshjes, të dy vendet do të hapin tregjet e tyre për investimet amerikane në minerale kritike, me Kamboxhian që gjithashtu do të zgjerojë mundësitë në energji, energji elektrike, telekomunikacion, transport dhe infrastrukturë. Në të njëjtën kohë, Kamboxhia garanton trajtim të drejtë për investitorët amerikanë, mbrojtje të tregtisë dixhitale dhe standarde të forta të punës dhe mjedisit.

LEXONI GJITHASHTU:

• Putin tha se testoi një raketë bërthamore, reagon Trump: E papërshtatshme
• SHBA dhe Kina bien dakord për një marrëveshje tregtare përpara takimit Trump-Xi