Aksion i madh policor në Rio de Janeiro: 20 të vrarë, mbi 80 të arrestuar

Në një operacion të madh policor në favelat e Rio de Janeiros, i cili filloi sot, të paktën 20 persona humbën jetën, përfshirë një polic, dhe të paktën 81 persona u arrestuan, raportuan mediat lokale.

Tetë anëtarë të forcave të sigurisë u plagosën gjatë aksionit dhe katër civilë u goditën nga plumba qorr.

Sipas portalit brazilian Odia, u arrestuan gjithsej 81 të dyshuar dhe u sekuestruan 31 pushkë automatike dhe një sasi e madhe narkotikësh.

Të plagosurit përfshinin Zëvendës Shefin e Administratës Kundër Drogave (DRE), katër oficerë policie dhe tre anëtarë të policisë ushtarake, përfshirë dy anëtarë të njësisë elitare BOPE dhe një anëtar të njësisë së qenve (BAC).

Guvernatori i shtetit federal të Rio de Janeiro, Claudio Castro, tha në një konferencë për shtyp se policia beson se udhëheqës të lartë kriminalë fshihen midis banorëve të vendbanimit.

“Ky është operacioni më i madh që nga viti 2010 dhe po zhvillohet pa ndihmën e forcave federale. Rio është i vetëm në këtë operacion. Armët që shohim nuk vijnë nga këtu, ato hyjnë përtej kufijve dhe financohen nga pastrimi i parave”, tha Castro, duke shtuar se më shumë se dy mijë oficerë policie morën pjesë në operacion.

Operacioni, i quajtur “Operacioni Kontroll”, është pjesë e iniciativës së qeverisë lokale për të luftuar zgjerimin territorial të CV (Comando Vermeillo) dhe për të arrestuar udhëheqësit kriminalë që veprojnë në Rio dhe vende të tjera, raportoi CNN Brazil.

LEXONI GJITHASHTU:

• Presidenti i Brazilit: Nesër do bisedojmë me Trumpin për tarifat
• E rëndë në Brazil/ 36-vjeçarja helmon 4 persona, arrestohen edhe bashkëpunëtorët